Prólogo
Nueva York, mei 2015. Un bunita dia den primavera, ku hopi solo den e siudat ku nunka ta drumí. Mi ta einan pa promé biaha, ku un mishon. En buska di e rastro nan di Julian Abraham, un persona hòmber hóben katóliko-maronita ku na final di siglo 19 for di un pueblito den montaña den e Valle Sagrado na Líbano, ku den e tempu ei tabata parti di e Imperio Otomano, riba 25 mei 1896 a yega Nueva York. For di momento ku mi a deskribí Julian Abraham den e registrashon di Ellis Island, mi tabata sa ku mi kier a mira ku mi propio wowonan e isla den Hudson. Kon lo mester tabata pa despues di un biahe trans-Atlantiko di simannan largu pa, ku sentenáres di otro biaheronan ‘paketá’ den e bodega di Marsala, yega den e haf di Nueva York. Kon lo tabata, pa morto kansá, kargando un bolsa di lona, baha for di barku i mira e imposante Estatua di Libertat na banda robes i na banda drechi Manahattan. E Mundo Nobo. Henter dia mi ta dualu fasiná i de bes en kuando ku un nudo den mi garganta, den e edifisio di yegada unda diariamente míles di emigrante ta bin tende ku si nan ta ser atmití si òf no. Mi ta subi e trapi largu bai ariba, unda médikonan tabata para pa opserva i someté e emigrantenan, sin ku nan sa, na e promé kontrol médiko. Esnan ku kokochá òf ta sin aliento por a wèl lubidá entrada, gobièrnu merikano no tabata ansioso pa risibí personanan ku kisas lo por nifiká un riesgo finansiero. Portrètnan, videonan i grabashonnan, mi no por a kansa di wak nan! I mi no ta e úniko. Tur kaminda rònt di mi ta tende mayornan orguyoso konta nan yunan di nan antepasadonan ku for di tur banda di mundu na e sitio aki a pone nan promé paso riba suela Merikano. Miónes di Italiano, Irlandesnan, Aleman i hudiunan di parti Este di Oropa a bini for di e kontinente bieu pa e Mundo Nobo; e desénas di míles emigrantenan kristian for di Medio Oriente ku na fin di Siglo 19 a establesé nan mes tabata solamente un fota den e “melting pot” Merikano.
E promé emigrantenan Árabe a yega Estádos Unídos despues di e guera sivil di 1860 na Líbano, unda hopi kristian a pèrdè nan bida den e violensia islámiko. Kambio di rutanan komersial despues di apertura di Suez kanal a hinka e regio den un malaise ekonómiko ku a indusí na un segundo fluho di emigrashon. Ku eksepshon di algun mòslem, nan tabata kristiannan di Este, prinsipalmente Marionitas i Julian Abraham tabata un di nan. Den e atministrashon di Servisio di Imigrashon nan tabata registrá nan komo Syriër. Nan tabata bai biba den e parti sur di Manhattan den Kaya Washington. E bario Little Syria rondó di kambio di siglo tabata konta riba mas o ménos tres mil habitante. E bario aki a desaparesé na aña 1940 ora a konstruï “Brooklyn-Battery Tùnel” bou di East River, pero tin biaha historia ta divulgá un di su sekretonan; den e ruinanan di e dos edifisionan di World Trade Center ku dia 11 sèptèmber 2001 a basha abou despues di un atake terorista, a bin haña un blòki piedra ku e inskripshon di Saint Joseph Maronite Church. E piedra aki aktualmente ta den ekshibishon den e vitrina di e katedral marioneta Our Lady of Lebanon den Brooklyn.
Den e iglesia, despues di un sirbishi imposante papiá i kantá den idioma Ingles-Árabe, mi a sende un bela grandi pa Julian Abraham, e ‘farmer’ di 26 aña di edat ku a yega komo Halil Ibrahim na Ellis Island i algun ora despues komo Julian Abraham den Manhattan a pone su promé pasonan den e pais di posibilidatnan ilimitá. Duana riba Ellis Island tabata duna e hòmber i muhénan eksótiko for di Levant ku nan nòmbernan Árabe difísil pa pronunsiá inmediatamente na yegada un nòmber nobo pa amplia nan oportunidat riba trabou i éksito. E kambio di nòmber aki añanan despues hopi biaha ta forma un opstákulo insuperabel pa nan desendientenan en buska na nan raisnan genealógiko.
Julian Abraham na aña 1870 a nasé na Serhel den Monte Líbano i a fayesé na aña 1931 riba Bonaire. E tabata e tata di Julio Abraham (1909-1960) i abuelo di Toon (1936) i Jopie (1948) Abraham. Julio i su dos yu hòmbernan tabata polítikonan Boneriano ku entre 1949 i 2010 a destaká nan mes den polítika di Antia Hulandes i tabata testigu di momentunan importante den e historia komun ku Hulanda. E dinastia polítiko ta kontené e periodo di e promé elekshonnan parlamentario den e kolonia na 1949 te na e final estatal na aña 2010 di e pais ku den kuadro di dekolonisashon na aña 1954 a keda establesé. Tres polítiko legendario. E Hòmber di pueblo, e Empresario-Polítiko i e Revolushonario.
E idea pa un buki a originá na aña 2009 durante un selebrashon festivo di Dia di Bonaire un hòmber delegá di edat hopi avansá a keda yamá for di den públiko pa ser destaká komo Siudadano di Honor debí na su méritonan riba tereno musikal. Popo Ricardo. Miéntras ku e kondekorado den su bachi blanku ku pasonan firme a subi e podio unda gezaghebber lo a dirigí palabra na dje, su bos tabata zona den e spikernan. Un di su kansionnan mas konosí: e piesa ku Boeis Haile a komponé komo homenage na Julio Abraham, e polítiko ku na aña 1960 na pik di su karera a aksidentá trágikamente. Ta kasi 50 aña despues, pero tur kaminda rònt di mi, mi ta mira personanan di edat ku lágrima na wowo kanta huntu. E momento ei mi a disidí ku un dia lo mi ke sa mas over di Julio Abraham. Mi tabata sa di dje, di storianan, pero ken e persona aki tabata realmente; dikon e tabata asina stimá ku personanan ku tabata konosé di ántes ainda tabata bira asina emoshoná?
Na Hulanda nan ta skibi vários biografia di polítikonan konosí, na Antia esei apénas ta sosodé. Na 2014 mi a tuma e kurashi i a dirigí un petishon na Jopie Abraham, e flamante polítiko visionario ku komo periodista mi a siña konosé bon i ku despues di un karera polítiko largu na aña 2010 a baha ku penshun. Ku e pregunta ku si e i su famia lo kier a koperá na un biografia over e dinastia polítiko den kual mi kier a konta e historia personal di e personanan prinsipal den e konteksto di e tempu den kual nan bida a desaroyá. Un perspektiva históriko. Mi a pidi e libertat pa por puntra tur sorto di pregunta, over di tempunan bon i malu, tur kos mi tabata kier a sa. No un biografia asigná, pero un historia independiente. E famia a duna mi nan konfiansa pa kual mi ta masha agradesido na nan. Pero inesperadamente a resultá ku mi tambe por a duna algu bèk: e historia di e emigrante Julian Abraham.
E búskeda di nan abuelo a kuminsá momento ku mi a puntra di unda e famia originalmente ta bini. Ken tabata e tata di Julio Abraham, kon un tempu ela yega Antia, su yunan tabata influensiá dor di su desendensia Árabe? Niun hende tabatin e kontesta. E úniko pista tabata e buki matrimonial di Julian Abraham for di kual mi tabata sa unda su wig tabata i ken su mayornan tabata. Tabatin ún portrèt di Julian i su esposa kurasoleño Clarita. Mas no tabatin na dokumento. Sí tabatin vários storia over di nan matrimonio frakasá. Grásias na búskeda den Archivo Nashonal di Kòrsou i ku ayudo di un antropólogo penshoná di Coro na Venezuela, unda Julian a biba algun aña, a logra haña un bon bista riba su bida na Coro i na Kòrsou. Pero te ainda mi no tabata sa kon ela yega ei.
Hopi Libanes kristian ku na fin di siglo 19 i komienso di siglo binti a muda pa Amérika Norte i Sur, a resultá eksepshonal eksitoso den negoshi i nan desendientenan frekuentemente ta hasi karera polítiko. Pa generashonnan mas hóben, kurioso pa sa e raisnan di nan famia, hopi biaha ta difísil logra pasobra e nòmbernan original Árabe na emigrashon a bai pèrdí. E nòmber Abraham riba Internet apénas ta un término di búskeda útil, di aartsvader di kristian, hudiu i mòslem nan té Abraham Lincoln. Wèl a sali rápidamente na kla ku Abraham probablemente tabata Ibrahim. E jabi pa e nòmber Julian tabata un artíkulo over di Carlos Slim, e konosido empresario mehikano ku algun aña a ser konsiderá komo e hòmber di mas riku na mundu. Carlos Slim ta yu hòmber di e emigrante libanes katóliko-maronita Julian Slim, kende komo Khalil Salim a bin resultá na México. Un gran avanse. E archivo di Ellis Island, unda outoridatnan entre e apertura na 1892 i siere na 1954 a registrá diesdos mion emigrante, ta digitalisá i un fuente inestimabel di informashon. Hamas lo mi lubidá e sensashon di emoshon ku a dominá mi ora ku e úniko emigrante ku tabata kumpli na tur kriterio a aparesé riba pantaya di mi laptop. Dos aña despues di su yegada na Nueva York mi a bolbe bin topa Julian Abraham, e biaha aki komo pasahero di e bapor Prins Willen IV van de Koninklijke West-Indische Maildienst, ku kual ela biaha di Nueva York pa Kòrsou, den tránsito pa Coro. Pa e nietunan Abraham e destino di nan abuelo deskonosí tabata un konsiensia emoshonal ku no solamente ta tira un lus riba e añanan hubenil di nan tata Julio pero tambe riba nan propio orígen. Pa mi tabata klaro ku e historia di e tres polítikonan lo no por ta kompleto sin e historia intrigante di e emigrante Libanes ku na aña 1931 den un graf anónimo di tera den kerkhof di Bonaire a haña su último lugá di sosiegu.