Jopie Abraham ~ Harry Belafonte i Boneiru

augustus 21, 2018

Belafonte2

Mas biaha mi a lesa den vários publikashonnan mentiranan flagrante i informashon engañoso en kuanto e kantante i aktivista pa derecho humano mundialmente konosí Harry Belafonte i su supuesto relashon ku nos isla Bonaire.
E mal informashon aki ta sosodé den nos medionan lokal pero tambe por medio di nos gobièrnu.

Mi ta referí e.o. na e revista resientemente publiká “Bon Bini BONAIRE” ku ta un edishon di e Gabinete di Gezaghebber, ku dos bes pa aña lo sali i ku ta destiná pa tur hende ku ta interesá den Bonaire i su habitante nan.

Ya for di e promé edishon den e introdukshon titulá “Aangenaam” tin un inkreibel kantidat di ineksaktitut i simplemente mentira menshoná en kuantu Harry Belafonte i su supuesto amor pa Bonaire.

Mi ta “quote”: ”E famoso kantante merikano, aktor i aktivista pa derecho humano Harry Belafonte tabata pa desénas largu mucha di kas (“kind in huis”) na Bonaire. Huntu ku un sosio komersial ela desaroyá e bario kual su nòmber ta referí na dje: Belnem. E Rei di Kalipso un tempu asta tabata ko-propietario di Klein Bonaire ku na aña 1957 a inspir’é pa traha e Hit mundial “Oh, Island in the Sun”. E revista aki ta alabes dediká na e isla paraiso den solo ku Belafonte a kanta di dje.(Unquote)

A propósito, e website “Beautiful Bonaire” ( https://www.beautiful-bonaire.nl/natuur/klein_bonaire.html ) tambe ta skibi inkreïbel hopi mal informashon (òf simplemente mentira) en kuanto e kantante aki i su supuesto amor pa Klein Bonaire.

Belafonte1

Supuesto echo manera “Harry Belafonte (New York 1 mart 1923[mester ta 1927])..” ademas tabata enkantá ku Bonaire i pa dékada ta bishitá e isla buseo aki….Harry Belafonte a enamorá por kompleto ku Klein Bonaire i asta a skibi e kansion “oh, Island in the Sun” komo un “ode” na e bunita isla di koral aki. Belafonte un tempu asta tabata propietario di Klein Bonaire” no ta kuadra ètòl ku bèrdat.

Awèl aki ta sigui algun echo i bèrdat:

Echo 1. Harry Belafonte na aña 1957 den e pelíkula “Island in the Sun” a kanta e kansion di e mesun nòmber. Esei no tabatin apsolutamente nada di aber ku Bonaire ni Klein Bonaire. Es mas: Belafonte na aña e tempu ei ( na1957) no tabata ni sikiera konosé Bonaire.

Echo 2. Ta te na aña 1965, tempu ku mi mes tabatin 16 aña, Harry Belafonte riba invitashon di mi ruman Toon a bishitá Bonaire pa promé i último biaha. Nunka anterior ni despues e no a regresá Bonaire. Pues no tin apsolutamente nada bèrdat di “mucha di kas” (kind in huis) ni “desena di aña”. Riba invitashon di Harry Belafonte mes i Toon algu aña despues a bishit’é na su kas na New York.

Echo 3. E kansion “Island in the Sun” ta data di e pelíkula di 1957, ocho (8) aña promé ku Belafonte un solo biaha a bishitá Bonaire. Nunka ántes ni sikiera ela yega di tende di e isla aki ni di Klein Bonaire.

Belafonte3

Echo 4. E empresario Maurice Neme di Aruba ku tambe tabata konosé Harry Belafonte a kombiná su mes fam i esun di Belafonte pa su plannan pa konstrukshon di kas na parti sùit di e isla i a yama e proyekto ei “Belnem”. E mesun Neme aki huntu ku algun ko-akshonista tabata doño di Klein Bonaire, pero Belafonte mes no tabata ni akshonista den esei. En breve: Belafonte nunka no tabata ni parsialmente propietario di Klein Bonaire.

Echo 5. Despues di su promé i úniko bishita na Bonaire na aña 1965 Harry Belafonte nunka mas a regresá Bonaire. Pa ami komo teenager tabata tremendo pa huntu ku mi mama i ruman muhé mas chikí, Lexy, por a risibí Harry Belafonte na nos kas na Playa (banda di Restorant Zeezicht unda nos a nase, biba i krese). Aki Belafonte a regalá e dòbel albùm di dje titulá “Belafonte at Carnegie” i a firma esaki pa mi i menshoná: “To my dear friend Jopie, It was a pleasure meeting you.”
Balapena menshoná ku durante su estadia na Bonaire e artista Roger Moore, ku tabata na Caracas pa presentá su serie di pelíkula “The Saint” a keda invitá pa bin Bonaire i Harry Belafonte i Toon a bai busk’e na aeropuerto. Ela keda algun dia -meskos ku Harry Belafonte- den Hotèl Bonaire (niun otro kaminda). Hotèl Bonaire tabata bou di maneho di un konosí di Belafone, e empresario di Nueva York Bill Miller. Harry a konta ku su promé presentashon públiko na Estádos Unídos tabata den e Nightclub di Bill Miller na New York,

Belafonte4

Na mi opinion e uso inkorekto i ilegal (sigur pa propósitonan di propaganda i promoshon) di otro persona su nòmber i fama por nifiká mas malu ku bon pa nos isla. Lo ta masha dañino pa Bonaire si Belafonte (ku entre tantu tin 91 aña ) òf su agente tuma nota di e mal informashon ariba menshoná i hasi esei internashonalmente konosí.

Ta suavemente bisá bastante lamentabel ku asta nos propio gobernashon ta duna informashon inkorekto i engañoso i ta malusá e fama di un selebridat (persona famoso) pa propagandá (Klein) Bonaire.

E dos fotonan athunto ta mustra e bishita si Harry Belafonte na nos kas na Bonaire. Riba e fotonan por mira mi mama Caridad (Da), rumannan Toon i Evy, primu Anton Berkemeyer, Juancho Obersi i mi mes persona i Harry Belafonte.

Riba e dos otro fotonan por mira Toon i (eks)gezaghebber R. Saleh i Maurice Neme na yegada di Harry Belafonte.

Geef een reactie

Het e-mailadres wordt niet gepubliceerd. Verplichte velden zijn gemarkeerd met *