Ben Oleana ~ Bonaire Holding Maatschappij & Bon Gobernashon. Karta pa Sekretario di Estado Knops

April 25, 2020

Zonsondergang

Tópiko: Nesesidat pa implementá Bon Gobernashon (“Corporate Governance”) di kompania- y
fundashonnan di gobièrnu (“entidatnan gubernamental”) na Boneiru

Kralendijk, 14 di aprel 2020

Respetable Sr. Knops,

For di 1 di novèmber 2019 suskrito ta aktua komo direktor interino di Bonaire Holding Maatschappij N.V. (“BHM”). Durante e periodo aki Kolegio Ehekutivo di Boneiru a disidí pa implementá e rapòrt di e ofisina di CrmLiNK (“Naar een actief aandeelhouderschap”) (“e Rapòrt”) ku determinashon y urgensia. Den e karta aki mi kier a indiká e difikultatnan ku mi ta mira y kon lo por solushoná nan.

1. E asuntu di bon gobernashon pa entidatnan gubernamental riba e islanan di Hulanda Karibense ta un problema ku ya a eksistí pa dékadanan largu kaba. Ta p’esei durante di e proseso di desmantelashon di Antianan Hulandes ya a introdusí un Ordenansa di Gobièrnu Sentral tokante Corporate Governance huntu ku su Code Corporate Governance (tokante Bon Gobernashon).
E Ordenansa aki ta limitá e forma ku Gobièrnu Sentral por hasi uso di su podernan komo akshonista den N.V. -nan y komo stakeholder den fundashonnan, den sentido ku e Gobièrnu konserní mester pidi konseho di un konsehero independiente riba tereno di bon gobernashon promé di por tuma desishon. Y e konseho aki ta públiko. Gobièrnu por desviá di e konseho bou di kondishon ku e motibunan y hustifikashon pa hasi esei tambe wòrdu publiká.

2. Ounke e Ordenansa Corporate Governance aki no ta ekskluí tur klase di influensia polítiko den entidatnan gubernamental, e areglo aki sí ta pone un límite na esaki. Eksperensia na Kòrsou durante último añanan ta prueba esei. Sin embargo, na Boneiru e situashon ta otro, manera e siguiente puntonan lo demostrá.

3. E Ordenansa di Gobièrnu Sentral di e tempu ayá no a bira parti di e konstelashon nobo di Boneiru despues di e desmantelashon di Antianan Hulandes. Mi no sa di kon esei no a sosodé. Solamente un elemento di e Ordenansa ei (espesífikamente supervishon preventivo di nombramentunan) a wòrdu poné den man di Representante di Reino. Lástimamente, e areglo aki no ta funshoná. Entre otro no ta bon reglá kua kriterionan di evaluashon mester usa.

4. Ounke e Code Corporate Governance sí t’ei y ku esaki por wòrdu usá pa dirigí e entidatnan ligá na gobièrnu di Boneiru, e realidat ta ku e Code aki ta vigente solamente si el a keda inkorporá (boluntariamente) den statutonan di e diferente entidatnan gubernamental. Ta p’esei e posibilidat di influensia polítiko den entidatnan ligá na gobièrnu di Bonaire pa gran parti a keda eksistí.

5. E Rapòrt ta referí na e problemátika aki. Ademas, e Rapòrt tambe ta señalá diferente eror- y difikultatnan riba tereno di bon gobernashon den seno di N.V.- y fundashonnan di gobièrnu di Boneiru. E Rapòrt ta trese diferente sugerensia dilanti pa mehorá e situashon aki. Asina ta ku Kolegio Ehekutivo, manera ta konosí, a nombra un ‘kwartiermaker’ kaba. E persona konserní ya a kuminsá wak ta kon por elaborá e sugerensianan rekomendá den e Rapòrt.

6. Sin embargo, durante último lunanan e kwartiermaker a demostrá ku e no ta òf no por aktua neutral y independiente y ku no por papia kuné over di esei tampoko. Loke a sali na kla espesífikamente ta ku e kwartiermaker en realidat ta un kompinchi polítiko. Pero esei ta similar na un asosashon di karnisero ku ta stipulá regla pa kùr e kalidat di karni. Esei no por. E duda ku ya a surgi a base di sierto eksperensia a bira preokupante ora e kwartiermaker a bisa direktiva di BHM frankamente ku e (asuntu di) entidatnan gubernamental ‘no tin prioridat’.
E involukrashon polítiko y e echo ku en bèrdat ‘no tin prioridat’ tambe por wòrdu dedusí di e  echo ku no a nombra komisarionan pa e entidatnan gubernamental – ku eksepshon pa BonLab -, apesar ku dia 7 di yanüari BHM a entregá un petishon pa hasi esei y a manda diferente rekordatorio despues.

7. Durante e último mei aña komo direktor di BHM mi a mira y eksperensiá diferente di e problemanan aki. Ta p’esei mi a komprondé mas y mas durante e periodo aki ku, ni maske ta akseptá tur e rekomendashonnan di e Rapòrt, e problema real no ta wòrdu ataká. Y esei ta e problema persistente di involukrashon polítiko den e entidatnan gubernamental. Mi tin ku enfatisá aki ku e fenómeno no-deseabel aki, esta di involukrashon polítiko, ta eksistí tur kaminda. No ta un problema úniko di Boneiru.

8. Tambe mi kier enfatisá ku e involukrashon aki no nesesariamente ta kondusí na korupshon òf komportashon ilegal. Hopi biaha ta trata di influensia sutil òf di interesnan konfliktuoso y/o interkonektá kasi invisibel, ku no ta wòrdu rekonosé ni atmití. Ta trata aki di un fenómeno ku lógikamente mester okurí ora polítika ta muchu serka di e (bon) gobernashon di entidatnan gubernamental. No ta realístiko pa spera di Kolegio Ehekutivo òf di e diputado responsabel pa no purba kanalisá y implementá nan maneho polítiko via di e entidatnan gubernamental.

9. Sin embargo, ni maske por komprondé di kon esaki ta sosodé, e tin konsekuensianan importantísimo y di prinsipio. Y hopi biaha konsekuensianan super negativo tambe. Ambishon, motibunan y puntonan di salida ideológiko di polítika insular pa dirigí e isla no por wòrdu usá pa dirigí kompanianan privá loke e entidatnan gubernamental en realidat ta. Si ta hasi esei tòg, e direktor- y supervisornan (komisarionan) di e entidatnan aki lo haña nan mes den un situashon prekario y imposibel. Di un banda konforme lei y statutonan nan ta obligá pa romové e metanan statutario y interesnan di e entidat, pero di otro banda nan ta wòrdu fòrsá dor di e akshonista polítiko pa sirbi interesnan polítiko. Mi ta mira esaki sosodé diariamente.

10. Den un komunidat chikitu, manera esun di Boneiru, e problema aki ta asta mas fastioso. Kasi tur dia tur hende tin di haber ku otro. Tin interesnan estrecho ku di un òf otro manera ta involukrá ku otro. Ta p’esei ta hopi difísil, sigur pa polítiko- y direktornan, pa separá efektivamente e interesnan di e organisashon ku ta kai bou di nan responsabilidat for di otro interesnan esensial di, por ehèmpel, hende rònt di nan ku den otro kapasidat tin di haber ku e mesun organisashon.
E ehèmpel klásiko ta ora ta limitá subida di tarifa, pasobra esaki lo ta kontra e interes di esnan ménos pudiente òf di otro gruponan. For di un punto di bista polítiko esaki ta totalmente legítimo, kisas asta obligatorio. Sin embargo, e por ta kontra e interes di e organisashon konserní, loke asta por kondusí na su kiebro finansiero. Durante último añanan a mira ehèmpelnan tristu di esaki riba tur e islanan di èks Antianan Hulandes. Kòrda, por ehèmpel, e debakelnan na Kòrsou, kaminda e entidatnan gubernamental IUH N.V. y RdK N.V. a pèrdè mionnan di dòler komo konsekuensia di influensia polítiko. Loke ta trata St. Maarten, tur dia nos por lesa den korant kiko a pasa ku e haf ayanan. Na Aruba gobièrnu ta pèrdè kaso tras kaso den Korte, kada biaha ku un Ministro a mete na un forma ilegal ku un entidat gubernamental atrobe. Y na Boneiru, realmente, e situashon no ta mihó.

11. Pues, aparentemente, no ta realístiko pa eksigí di esnan polítikamente responsabel pa nan mes mantené e separashon nesesario aki. Pa motibu di su eskala chikitu permanente, no por kompará Region di Karibe ku Hulanda tampoko. Esaki a pone mi komprondé ku e separashon nesesario entre responsabilidat polítiko y e ehekushon di esei den kuadro di funshonamentu di entidatnan gubernamental mester wòrdu marká na un manera hopi mas kla.

12. Na mi opinion, lo no ta posibel pa implementá e rekomendashonnan di e Rapòrt na un manera efektivo, si no ta solushoná e problema kousante di involukrashon (polítiko) struktural na un manera kla y efektivo. Teniendo kuenta ku e realidat aki, ta rekomendabel pa no pone e proseso di implementashon den man di e polítikonan mes, òf bou di nan responsabilidat, pero pa enkargá persona- òf organisashonnan eksterno y independiente ku esaki. Naturalmente, esnan polítikamente responsabel si mester akordá e kuadronan dentro di lokual e proseso aki mester tuma lugá.

Huntu ku nos team, mi lo sigui promové bon gobernashon pa e entidatnan gubernamental Boneriano, espesífikamente pa BHM. Ta p’esei mi ta spera ku bo persona ta dispuesto pa konsultá ku nos over di e sugerensianan hasí y e kontenido di e karta aki.

Atentamente,
na nòmber di
BONAIRE HOLDING MAATSCHAPPIJ N.V.,

1 reactie op “Ben Oleana ~ Bonaire Holding Maatschappij & Bon Gobernashon. Karta pa Sekretario di Estado Knops

  1. Pingback: Over behoorlijk bestuur II – Auke van der Berg ~ Ikki's eiland. De horzel van het koninkrijk

Leave a Reply

Your email address will not be published. Required fields are marked *