Drs. John Schermer
Kua tabata e promé famianan di Boneiru? Un pregunta interesante i importante. Pero tambe difísil pa kontestá, pasobra for di e promé bonerianonan, amerindio òf indjannan, no por yega na indiká e promé famianan boneriano.
John Schermer a trata pa haña kontesta pa loke ta trata famianan di orígen indjan, pero lamentablemente e no a logra. E ta splika dikon: “Ta lástima ku no por a inkluí e indjannan ku pa hopi siglo a habitá nos isla di Boneiru, pasobra nunka nan no a ser registrá ningun kaminda, maske ku nan tabata kai bou di un ‘kapitein van de Indianen’ tempu di WIC. Tokante nan sistema di biba nos por lesa den publikashonnan di Frans Booi i estudionan arkeológiko ku Jay Haviser a hasi aki na Boneiru. Publikashonnan di Luc Alofs i di R.H. Nooijen o.p. tokante historia di Aruba i Boneiru den futuro lo por yuda trese mas klaridat enkuanto e poblashon indjan.”
Afrikano
Schermer mester a hasi hopi esfuerso pa haña sa kua tabata e promé famianan boneriano di orígen afrikano, pa motibu ku nan no tabata den registro di poblashon, sino den inventario di WIC.
E promé katibunan den relashon familiar a keda registrá na 1744. Riba e lista di inventario aki ta aparesé pa promé biaha nan famnan. Algun ehèmpel: Anthonica, Bomba (Anthony Bomba), Coffie, Datto, Domacasse, Foluba, Frans, Goeloe, Janga, Makaai, Wanga. Por por ripará ku den e nòmbernan aki tin e sekuensia di alfabèt. Schermer ta yama nan e promé famianan boneriano, pasobra mayoria di nan yunan i nietunan a nase na Boneiru i nan antepasadonan no tabata aki, sino di Afrika.
Oropeo
Schermer den su estudionan a investigá tambe e promé oropeonan ku a establesé na Boneiru despues ku Hulanda a konkistá Boneiru na 1636. Asina el a topa ku e nòmber di Pieter Boom ku for di 1709 tabata asistènt siruhano riba e isla aki. Tabatin tambe kuater kabayerista i un sòldá.
Na1758 ta haña e nòmbernan Theunis Kock, Jan Evertsz, Jan Gijsels, Charles Bousingh. Na 1764 Michael Romer, Cornelis Boekhoudt. Na 1769 Thielman, Bislik i Daal. Na 1780 Christiaan Dammers, Frans de Jongh. Na 1782 Frans Thode i Semeler. Na 1787 Gerrit Raenes. Di e ámtenarnan aki no tin informashon di nan kasá i nan yunan den registro di Boneiru. Pero un kos ta sierto: algun di e oropeonan aki a kasa despues ku muhénan indjan.
Kultura afrikano
Segun John Schermer, ora analisá diferente kargashon di barku di katibu ta ripará ku na bordo tabatin un kantidat signifikante di mucha (19%) i asta yu na lechi. Ora e kargashon yega Kòrsou tabata bende mayoria di e katibunan adulto ku paisnan di kontinente merikano. E ora ei e famianan hóben tabata keda atras den e plantashinan lokal di West Indische Compagnie.
Entre añanan 1700 i 1744 (mira tambe Norbert Hendrikse) ta skohe un kantidat di famia for di nan i barka nan manda Boneiru.
E barkunan di katibu tabata sali for di diferente pais na Golfo di Guinea, manera Guinea, Ghana, Dahomey, Kongo, Angola. Komo ku e katibunan tabata bini di diferente pais, nan no tabatin un idioma komun.
Alrededor di 1730 ta amplia e grupo bieu na Boneiru ku famianan hóben for di Kòrsou. Mira grafik aki bou. E grupo nobo aki no ta integrá fásilmente ku e grupo bieu, pa falta di un idioma komun. Loke nos ta mira den e grafik aki bou ta tambe ku e grupo di edat avansá ku nòmber afrikano ta bira ménos i e grupo di famianan hóben ta sigui oumentá. P’esei traspaso di kultura afrikano meramente a tuma lugá.
wèpsait: http://www.bonairefamily.com/