Bo mester tabata pober pa komprondé e abestrus. E konosementu ku bo tin porloménos algun siman di trankilidat, ta pone ku bo por hala rosea di alivio. Bo por hinka bo kabes te den santu aya i lubidá tur bo preokupashonnan. Resibunan ta pagá, pa algun dia bo por kumpra kos. Bo tin trankilidat. Pousa un ratu di tur e dianan ei yen di doló di barika.
E tin un ènvelòp den su man.
Fuera di un saludo amikal, nos no ta bisa otro nada. Mi ta bai sinta na otro banda di e banki. Ta trankil den Kaya Bolivar.
E ta saka algun papel for di e ènvelòp i ta mira e papelnan.
E ta hala rosea grandi.
Despues di dies minüt mi ta lanta para. Mi ta kohe mi tas.
‘Mi por puntra bo algu?’, e ta bisa un poko tranká.
‘Naturalmente ’, mi ta bisa.
E ta mustra riba e papelnan.
‘Bo ta un abogado? Kiko tin pará aki?’
E ta mustra un di e kartanan.
Mi ta mira ku ta un sentensia di korte.
‘Nò, mi no ta abogado’, mi ta bisa, ‘pero por ta mi por les’é si.’
‘Nan a sentensiá mi’, e ta bisa. E ta duna mi e papelnan.
Mi ta sinta i ta lesa e sentensia.
Mas ku 9.000 dòler e tin ku paga.
‘Mi no tabata sa mas kiko hasi’, e ta bisa, ‘i p’esei mi a fia sèn lihé.’
Mi ta sagudí kabes. I bolbe lesa e sentensia.
E interes riba e fiansa ta diesseis porshento.
‘Mi hefe a yama mi’, e ta konta, ‘nan ke retené mas o ménos 800 dòler pa luna di mi salario. I mi ta gana solamente 1300,-. Ta kon nos ta biba asina?’
Mi ta sagudí kabes.
‘Diesseis porshento’, mi ta bisa, ‘ta hopi haltu.’
‘Nan tabata e úniko ku ker a fia mi.’
E ta duda un tiki.
‘Mañan mi ta bai papia ku mi hefe atrobe. E ta bai mira ku e por yuda mi.’
‘Esei lo ta bon’, mi ta bisa.
‘Tin hende ku a pèrdè nan kas di e manera aki’, e ta bisa, ‘mi sa ku tabata kos di kèns. Pero mi no tabata sa mas kon paga mi resibunan. I kon nos mester a kome. Mi kasá tabata malu. P’esei un tempu e no por a traha.’
‘El a bira bon?’, mi ta puntra.
‘E ta buskando trabou awor.’
‘Esei ta bon notisia’, mi ta bisa.
E ta sagudí kabes. E ta bolbe mustra riba su papelnan.
‘Pero pues ta tur esaki mi tin ku paga? Asina tantu mi no a fia.’
Mi ta splika ku banda di e fiansa i interes, e tin ku paga tambe gastu di deurwaarder i korte. Ku di e manera ei bo tin ku paga algun mil dòler èkstra.
E ta bolbe hala rosea grandi.
‘Mi tin bèrgwensa.
Mi ta sagudí kabes.
E ta mira mi.
‘Mi a kere ku bo ta abogado. P’esei mi a puntra bo.’
‘Nò, mi no por yuda bo. Pero podisé bo hefe si ’, mi ta bisa, ‘mi ta spera esei pa bo.’
Un tiki inkómodo nos ta despedí amikalmente.
Algun ora despues mi sa un tiki mas di interes i di interes pa fiansa eksorbitante i mi sa ku e kompania ku na e isla aki ta duna e tipo di fiansanan akí ta kai bou di un holding na Inglatera, ku un filial na Islanan Kaiman.
Si, bo tin mag di kobra e tipo di interesnan akí. Pero bo tin mag di kunsumí bo alma tambe ku e miseria ku e tipo di kompanianan akí ta kousá. Kobradó di interes eksorbitante ta keda kobradó di interes eksorbitante. Kon nèchi e nòmber ta parse riba edifisio.
Bo no por hasi nada kontra esaki. Si, bo por atvertí e abestrus. Pero no keda straño ku tòg e ta manda e formulario aden. Pobresa konosé su propio lógika.