Drs. John Schermer den diferente entrevista pa e programa di televishon Herensia a splika i aklará mas di e poblashon boneriano
Trabou impagabel
Pa por haña sa kon e boneriano a forma, kon famianan boneriano a originá, te ku Boneiru a bira nan kas, ta lógiko ku nos mester bai bèk den historia. Drs. John Schermer, un persona original di Rincon i awor bibá na Hulanda, a hasi un trabou impagabel pa registrá i analisá poblashon boneriano durante alrededor di 350 aña. El a atendé tantu e grupo di hende liber komo katibu, repartí den katibu di West Indische Compagnie (despues gobièrnu hulandes) i katibu partikular.
E estudio genealógiko ku Schermer a hasi ta aksesibel riba e wèpsait www.bonairefamily.com. Na okashon di ‘Dia di Rincon’ 30 di aprel 2007 el a presentá e wèpsait, ku el a renobá dia 7 di mei 2007.
Schermer a dediká 13 aña pa hasi e estudio aki, bishitando na promé instante Archivo Nashonal na Kòrsou. Despues el a bishitá tambe e archivo nashonal na Den Haag, Hulanda. Mas aleu el a hasi investigashon na Ofisina di Poblashon i Registro Sivil di Boneiru.
Datonan di katibu di WIC ta saká for di lista di inventario di katibu di West Indische Compagnie na Rijks Archief na Den Haag. Datonan di persona liber i di katibu ku a atkerí nan libertat ta saká for di Registro di Nasementu, Matrimonio i Fayesimentu na Boneiru entre añanan 1830 i 1900.
Datonan di e katibunan di rei (gobièrnu) i di Shon (partikular) ta saká for di korespondensia ku Ministerio di Kolonia wardá na Archivo Nashonal na Kòrsou.
Investigashon profundo
Tur hende por papia i bisa yen di kos, pero no tin ni ún persona, niun historiadó òf otro investigadó, ku a pasa den mas dokumento relatá na historia di Boneiru di masoménos 1640 te 1900, ku John Schermer. El a pasa den registronan di katibu (‘monsterlijsten’), inventarionan di West Indische Compagnie (WIC), kartanan di liberashon di katibu (‘vrijbrieven’), aktanan di benta/kompra di katibu, aktanan di nasementu, matrimonio i morto, hopi edishon di ‘Curaçaosche Courant’.
Ku e wèpsait www.bonairefamily.com Schermer ta kompartí ku komunidat boneriano i tur otro interesado e resultado di e investigashon genealógiko ku el hasi durante e periodo di 1993 – 2006. Su deseo ta pa e sait aki sirbi komo un plataforma di idea tokante e boneriano i su historia i ku kualke vershon ku sigui despues lo kontribuí na un aserkamentu mas ophetivo di historia di Boneiru.
Schermer no a hasi uso di interpretashon di personanan ku a studia i publiká e materia aki den pasado, entre otro Dr. J. Hartog, R.H. Nooijen o.p. i e publikashonnan di siudadano Bòi Antoin.
Kategoria di habitante
Drs. John Schermer a repartí pa su investigashon habitantenan di Boneiru den diferente kategoria. El a registrá/dokumentá nòmber di tur habitante di Boneiru entre añanan 1700-1900.
E promé parti ta duna e genealogia di e pueblo boneriano den e promé siglonan (1700-1900) i ta repartí den kuater kategoria di famia:
A Katibu di Westindische Compagnie (WIC)
B Katibu di gobièrnu
C Katibu di partikular
D Habitante liber na Boneiru 1700 te ku 1791
1800 te ku 1863
1800 te ku 1863
1800 te ku 1900
A. Ta repartí e promé kategoria, katibunan di WIC den 4 grupo:
1. Katibunan ku a forma famia i asina pone base pa e komunidat di Boneiru.
2. Katibunan ku durante e periodo aki a ser kumprá.
3. Katibunan ku nòmbernan original di Afrika.
4. Katibunan ku nòmber krioyo.
B. Ora WIC a stòp di eksistí na 1791 nan a pasa tur nan katibunan pa gobièrnu i ta p’esei tambe ku nos ta haña e katibunan aki te na 1863 riba e listanan di inventario di gobièrnu.
C. E di tres kategoria ta katibu di shon. Na aña 1863, na momentu di abolishon di sklabitut, tur doño di katibu a risibí un suma di 200 florin di gobièrnu pa kada katibu.
D. E último kategoria ta personanan ku despues di 1791 a haña pèrmit di gobièrnu pa establesé na Boneiru.
Método di trabou
Pa yega na e publikashon di famianan, Schermer mester a saka kada persona for di tres diferente registro pa konstruí un solo Registro di Persona.
Den Registro di Persona kada persona ta identifiká ku un òf mas fecha, por ehèmpel di nasementu, matrimonio òf fayesimentu. Uso di kòmpiuter tabata indispensabel, mas di dies mil nòmber, pa yega na e Registro di Persona.
Mester tene kuenta ku e echo ku ta identifiká kada persona ku un òf mas dato di e registronan di Boneiru; seguidamente e ta ser identifiká den relashon ku su famia. Pues un persona su so, sin famia, ni maske e tabatin un funshon importante den servisio di WIC, manera commandeur òf opzichter, tòg no ta aparesé den e sistema.
Tin vários nòmber den e tres registronan menshoná di kual no tin sufisiente informashon, konsekuentemente por lo pronto no por a inkluí nan.
Pa e desaroyo di famianan boneriano Schermer a hasi uso di korespondensia entre funshonarionan i nan superior, den kua nan ta duna kuenta di nan tarea.
Lista 1. Relato di kaptan i médiko bordo di barkunan ku a transportá katibunan pa nos region.
Lista 2. Plantashinan di Kòrsou, kantidat di katibu i krio di bestia.
Lista 3. Fayesimentu di katibunan.
Lista 4. Algun katibu i nan trabou ehersé na Kòrsou na aña 1722.
Lista 5. Katibunan di Boneiru na aña 1744.
Lista 6. Katibunan na Kòrsou na aña 1855 di kual mayoria ta di Boneiru.
Journal di commandeurnan despues di 1828.
Relatonan anual di diferente commandeur.
Korespondensia ku Minister di Kolonia na Hulanda.
Edishonnan di Curaçaosche Courant for di 1822.
Zie ook: http://ikkiseiland.com/john-g-schermer-bonaire-families/