Kerido J.,
A tuma un tiki tempu, pero mi ta kere ku mi sa awor dikon na Den Haag nan no ta konsiderá bo estudio pa enfermera, ku bo a sigui na bo isla natal, komo unu kompleto. E deskripshon ei ta pa mi kuenta.
Pa kontesta di bo mail di siman pasá, mi tabatin yudansa di un ámtenar ku ta bon versá den e lei (Lei BIG) di kua bo a bira víktima. Pa bo informashon, e señora akí a konta ku e problema ku bo ta enfrentá akí no ta nobo. Algun biaha kaba, Fundashon Mariadal a pone e problema na konosementu di e dos ministerionan konserní, pero parse ku te ku awe ningun hende no tabatin sufisiente kurashi pa bin ku un solushon.
Miéntras e minister di Salubridat, Bienestar i Deporte dje tempu aya, señora drs. E. Schippers, a skirbi na novèmber 2011:
‘Pa personanan ku finalisá un estudio na un di e islanan di Hulanda Karibense, pa loke ta trata registrashon den e registro di BIG, aki algun aña lo konta mes reglanan ku ta konta pa esnan ku finalisá un estudio na Hulanda.’
Awor por rèk ‘algun aña’ un tiki, pero nuebe aña si ta hopi largu.
Banda di ta un institushon ku ta ofresé kuido, Fundashon Mariadal (FM) ta tambe un institushon di enseñansa ku entre otro ta ofresé e estudio pa enfermera, ku bo a sigui.
FM a ofresé e estudio den koperashon ku ROC Top, ku tabata entregá diploma. Ora a resultá ku ROC Top no tabatin un desishon di rekonosimentu (erkenningsbesluit) segun Lei Edukashon i Enseñansa Profeshonal BES’, e no tabata outorisá pa entregá diploma na Boneiru. Ku esei a bin un fin na un maneho tolerante di vários aña.
Despues FM a hasi un petishon pa rekonosimentu di e estudio. Promé di ougùstùs 2018 na nòmber di e minister di Enseñansa, Kultura i Siensia, a duna FM e desishon di rekonosimentu. For di e momentu ei, diplomanan ku FM entregá ta kai dentro di e ámbito di aplikashon di e sistema di enseñansa di BES.
Manera bo a ripará último lunanan, esei no a logra loke bo lo por a spera.
Kontrali na diplomanan di institutonan di formashon hulandes rekonosé, diplomanan ku FM ta entregá no ta bin na remarke pa registrashon di BIG.
Prepará bo. Bo por sigui un prosedura di rekonosimentu, mira: Kapítulo VI di ‘Wet op de beroepen in de individuele gezondheidszorg’ (Wet BIG).
Ta konsiderá e diploma ku bo tin awor komo diploma di eksterior i pa esei ta konta otro regla. (Mira tambe: Kapítulo VI di Lei BIG). Mi ta manda bo e lei ei komo anekso.
Pa bin na remarke pa registrashon di BIG, pues bo mester haña un deklarashon di kapasidat profeshonal. Pa esei bo mester sigui un kaminda kostoso i largu.
Manera bo a skirbi, na Boneiru e registrashon di BIG no ta obligatorio. Na Hulanda Europeo si esaki ta un eksigensia. Awor ku pa sirkunstansianan familiar bo a bin biba den e parti di Reino aki, bo ta enkontrá limitashonnan di e posibilidatnan pa trabou adekuá. Bo no por traha komo enfermera, bo no por sigui studia, hasta stazje bo no por kore. Aunke mirando bo estudio, bo ta kumpli ku eksaktamente e mes eksigensianan di kalidat ku ta konta aki na Hulanda Europeo.
Apesar di e promesa di señora Schippers na 2011, no a dal ningun paso ainda pa solushoná e problema. Ei mi lo por agregá ku e dos ministerionan konserní – Enseñansa, Kultura i Siensia i Salubridat, Bienestar i Deporte – ya diferente biaha a primintí pa resolvé e trato desigual akí.
Dikon no ta sigui akshon tras di e promesanan aki? Ami no sa.
E señora amabel na Den Haag a mustra ku e solushonnan no ta asina kompliká.
Komo ku por kulpa ministerionan di hopi kos, pero no ku nan tin purá, el a skèts dos manera pa solushoná e problemanan ku bo a enfrenta.
Pa término korto, lo por adaptá ‘Regeling aanwijzing buitenlandse diploma’s volksgezondheid’ (Areglo asignashon diploma estranhero pa salubridat). Lo mi no kansá bo ku Artíkulo 13 di e Areglo ei i artíkulo 32 di lei BIG, pero kere mi numá ku a base di ‘Circulaire Vakbekwaamheid Buitenlandse Gediplomeerden Volksgezondheid (Kapasidat Profeshonal Sirkular Esnan Diplomá den Salubridat), di un manera simpel tin un solushon temporal pa bo problema. Pa término largu e solushon ta den un adaptashon di artíkulo 32 di lei BIG i Besluit opleidingseisen verpleegkundige (2011) (Desishon Eksigensia di Estudio pa Enfermera).
Si bo ke, mi ta manda bo henter e splikashon. Bo ta haña no solamente Artíkulo 2 di e Desishon ei regalo, pero tambe komo èkstra e artíkulonan nesesario for di WEB BES, WEB i artíkulo 6.13 di e Lei pa enseñansa superior i investigashon sientífiko.
Si bo ta bira felis ku esei, ami no sa.
Ken sa ku dentro di poko ta bini un kambio na Den Haag. Resientemente señora Tamara van Ark a bira e minister nobo di Salubridat, Bienestar i Deporte. Indudablemente e lo ke duna kontenido na su funshon nobo di un manera dinámiko.
Pa awor mi ta deseá bo forsa.
I mi ta spera ku e trabou via un ofisina di trabou temporal tòg ta duna bo plaser.
Saludo kordial,
—
Siman pasá mi a haña un e-mail di un enfermera ku pa motibu di sirkunstansia familiar a muda pa Hulanda Europeo algun luna pasá. El a puntra su mes dikon su diploma di Enfermera no ta konta na Hulanda Europeo. E búskeda pa kontesta a produsí korespondensia interesante. Manera hopi biaha, hopi rápido a presentá un man di yudansa.
Komo ku J. no ta e úniko víktima di e echo ku ta konsiderá Boneiru komo eksterior, den konsulta nos a disidí di publiká e karta akí.
Links
Wet BIG:
https://www.bigregister.nl/registratie/nederlands-diploma-registreren/wet–en-regelgeving
Hoofdstuk VI van de Wet op de beroepen in de individuele gezondheidszorg
https://www.parlementairemonitor.nl/9353000/1/j9vvij5epmj1ey0/vi3ako58niyr
Wet Educatie en Beroepsonderwijs BES:
https://wetten.overheid.nl/BWBR0028395/2020-08-01
Regeling aanwijzing buitenlandse diploma’s volksgezondheid
https://wetten.overheid.nl/BWBR0022606/2007-10-13
Besluit opleidingseisen verpleegkundige 2011
https://wetten.overheid.nl/BWBR0030267/2011-08-01
Wet op het hoger onderwijs en wetenschappelijk onderzoek
https://wetten.overheid.nl/BWBR0005682/2020-08-01
Circulaire Vakbekwaamheid buitenslands gediplomeerden volksgezondheid
https://wetten.overheid.nl/BWBR0027468/2015-12-22